Një ngjarje e rëndë dhune është regjistruar në Santeramo in Colle, në zonën e Barit, ku dy shtetas shqiptarë kanë sulmuar fizikisht efektivët e policisë italiane pas një ndërhyrjeje për parandalimin e një akti vandalizmi.

Ngjarja ndodhi pasditen e 22 qershorit, kur disa qytetarë njoftuan policinë në numrin emergjent 112 për një burrë që po përpiqej të dëmtonte një automjet të parkuar dhe po pengonte qarkullimin rrugor. Menjëherë pas mbërritjes së patrullës, situata u tensionua ndjeshëm: shqiptari nisi të shante dhe kërcënonte forcat e rendit, përpara se të godiste me grusht në fytyrë një prej efektivëve.

Përshkallëzimi i konfliktit nuk u ndal me kaq. Një tjetër shqiptar, bashkatdhetar i agresorit të parë, u përfshi në incident dhe filloi të qëllonte oficerët me shuplaka dhe grushte. Për të neutralizuar situatën, u desh ndërhyrja e një patrulle shtesë, e cila arrestoi dy burrat.

Të dy shqiptarët tashmë përballen me akuza të rënda për dëmtim prone, rezistencë ndaj arrestimit dhe dhunë ndaj zyrtarëve publikë në detyrë.

Ndiqni videon e ngjarjes me poshte!