Njëri nga njerëzit më të pasur në botë, Jeff Bezos, është zyrtarisht jashtë “klubit të beqarëve”.

Të premten, ai u martua me partneren e tij, Lauren Sánchez, në një ceremoni madhështore në Venecia, të cilën e konfirmoi vetë nusja përmes një postimi në Instagram.

Çifti kishte rreth 200 të ftuar në ceremoni.

Mes tyre ishin emra të njohur dhe të fuqishëm të botës, si Bill Gates, Ivanka Trump dhe Kim Kardashian.

Bezos, 61 vjeç, dhe Sánchez, 55, kurorëzuan dashurinë e tyre pothuajse dy vite pas shpalljes së fejesës. Prej muajsh, spekulimet për vendin dhe datën e dasmës kishin arritur kulmin. Në mars, kryetari i bashkisë së Venecias, Luigi Brugnaro, konfirmoi se çifti do të martohej në këtë qytet historik, ndërsa të dy janë parë disa herë në Itali gjatë javëve para ceremonisë.

Dasma ishte planifikuar fillimisht për të shtunën, por u zhvendos për të premten për shkak të ndryshimit të vendndodhjes, mes shqetësimeve për sigurinë dhe protestave në qytet. Disa banorë protestuan kundër ceremonisë duke shprehur shqetësime për mbingarkesën turistike që mund të sillte eventi dhe mungesën e përfitimeve për komunitetin lokal.

Martesa u zhvillua në ishullin San Giorgio Maggiore. Bezos dhe Sánchez mbërritën me taksi ujore të ndara.

Sánchez u pa më herët e veshur me një kostum krem Dior, ndërsa më vonë postoi në Instagram foton e parë me fustanin e nusërisë, duke ndryshuar emrin në profilin e saj në Lauren Sánchez Bezos. 

Fustani i nusërisë është qepur nga Dolce & Gabbana, me dantellë, jakë të mbyllur, kopsa në pjesën e përparme dhe fund në formë sirene. Ajo që e plotësonte pamjet ishte velloja e gjatë deri në tokë.

Jeff Bezos kishte zgjedhur një kostum klasik për këtë rast.

Çifti e bëri lidhjen publike në janar të vitit 2019, pak pas njoftimit të ndarjes së Bezos nga ish-bashkëshortja MacKenzie Scott. Në atë kohë, Sánchez ishte e martuar me producentin Patrick Whitesell, por çifti nisi procedurat e divorcit në prill të po atij viti.