Vlorë, 12 korrik 2025 – Falë ndërhyrjes së menjëhershme të strukturave të Policisë së Vlorës, u parandalua përshkallëzimi i një konflikti që mund të kishte pasoja për jetën. Ngjarja ndodhi mbrëmjen e 11 korrikut, rreth orës 23:30, në një lokal në lagjen “Uji i Ftohtë”, pranë vendit të njohur si “Rrapi”.

Sipas hetimeve paraprake, konflikti ka nisur për motive të dobëta mes dy shtetasve dhe ka degjeneruar në dhunë fizike. Gjatë përplasjes, shtetasi B. Gj., 64 vjeç, ka goditur me mjet prerës shtetasin G. V., 56 vjeç, në pjesën anësore të kraharorit.

Falë reagimit të menjëhershëm të shërbimeve të Komisariatit të Policisë Vlorë dhe strukturave të DVP Vlorë, autori u kap dhe u arrestua në flagrancë, duke u neutralizuar pa lejuar agravimin e situatës.

I dëmtuari ndodhet nën kujdesin e mjekëve në Spitalin Rajonal të Vlorës dhe raportohet jashtë rrezikut për jetën.

Shtetasi B. Gj. u arrestua për veprat penale:

“Plagosja e rëndë me dashje”,

“Prodhimi, mbajtja, blerja apo shitja pa leje e armëve të ftohta”.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme ligjore.

Policia e Vlorës vijon punën për parandalimin dhe goditjen e çdo rasti të dhunës dhe rrezikshmërisë në komunitet, duke theksuar rëndësinë e ndërhyrjes së shpejtë dhe bashkëpunimit qytetar për garantimin e sigurisë publike.