Një pasagjere e fluturimit Barcelonë-Tiranë, operuar nga kompania Wizz Air, ka dërguar një video dhe një ankesë në redaksinë e JOQ Albania, ku denoncon sjelljen e konsideruar të pahijshme nga ana e një stjuardi gjatë udhëtimit të tyre.

Sipas qytetares, avioni është nisur me 3 orë vonesë, dhe pasagjerët kanë kërkuar sqarime për situatën. Por përballë kërkesave të tyre, sipas saj, stjuardi është përgjigjur me arrogancë:

“Pas shumë pritjesh dhe kërkesave për shpjegim, stjuardi na u kthye: ‘Kujt nuk i pëlqen, është i lirë të dalë’. Nuk arrita ta filmoja të gjithë skenën sepse nuk e hapa kamerën me parë, por sjellja ishte e papërshtatshme,” – thotë ajo.

Në videon e dërguar shfaqet një moment tensioni ku stjuardi debaton me një zonjë, e cila i thotë: “Si mund të më thuash dil, mor zotëri?”, ndërsa ai i përgjigjet: “Mbaj vendin që të takon”. Më pas, ai i drejtohet edhe qytetares që po regjistronte videon, duke i kërkuar të ndalojë filmimin.

Denoncuesja shton:

“E dimë që kjo kompani ka pasur probleme, por të paktën të kishte staf të kualifikuar dhe të sjellshëm. Nuk është normale që një stjuardi t’i drejtohet udhëtarëve në këtë mënyrë, aq më tepër pas një vonese prej 3 orësh.”

Rasti sjell në vëmendje shqetësimet e shumta që janë raportuar ndër vite për cilësinë e shërbimit dhe trajtimin e pasagjerëve nga Wizz Air, një kompani që operon gjerësisht edhe në tregun shqiptar.

JOQ Albania mbetet e hapur për reagimin e kompanisë dhe për çdo sqarim që mund të japë në lidhje me këtë situatë.