Përgjatë orëve të fundit Adriatik Lapaj dhe Endri Shabani janë duke u “përplasur virutalisht”!

E teksa kanë vetëm pak orë për të zgjidhur këtë “ngërç” i cili mesa duket i ka prishur “harmoninë” që kishin para zgjedhjeve të 11 Majit, burime për mediat bëjnë me dije kreu i KQZ-së, Ilirjan Celibashi do t’u japë “të rinjve” edhe pak kohë për të zgjidhur këtë krizë mes tyre.

Mirëpo, nëse Lapaj dhe Shabani vijojnë të mos bien dakord, atëhere zyrtarisht daja i Endri Shabanit, Zeqir Kordhoni, do të lërë jashtë Kuvendit kreun e “Lëvizjes Shqipëria Bëhet”.

Ai prej ditësh tanimë ka deklaruar se dëshiron të bëhet deputet, por shanset që kjo “ëndërr” t’i plotësohet janë të pakta, mund të themi dhe zero, duke marrë parasysh rënditjen e tij në listë.

Ajo që kryeson këtë listë është Ana Dajko, kushërira e Adriatik Lapajt. Jo më larg se një ditë më parë, vetë Lapaj deklaroi përmes llogarisë së tij në “Facebook” se Shabani dhe dajo i tij nuk kanë për ta marrë mandatin.

Nëse formula e para zgjedhjeve mes dy “ish-aleatëve” nuk shkon ashtu si dhe ata e kishin menduar, atëhere ajo që do të futet në Kuvend do të jetë 60-vjeçarja, Ana Dajko.

Por, kush është Ana Dajko?

60-vjeçarja Ana Dajko është nëna e anëtarit të kryesisë së “Lëvizjes Shqipëria Bëhet”, Vasil Dajko si dhe rezulton të jetë edhe kushërira e largët e Lapajt. Ajo ka kryer arsimin e mesëm, ndërkohë që është e vetëpunësuar.

Burime për mediat thonë se në rast se Shabani dhe Lapaj nuk gjejnë një rrugëzgjidhje mes tyre atëhere zonja Dajko do të pranojë mandatin, me qëllim që ai mos t’i kalojë partneres së Endri Shabanit, Livia Stavri e cila është e dyta në listë.