Një grup studiuesish nga Universiteti Yale kanë identifikuar atë që ata e përshkruajnë si një gjendje të re shëndetësore të lidhur me vaksinat mRNA kundër COVID-19, e quajtur “Sindroma Pas Vaksinimit”.

Kjo sindromë përfshin simptoma si lodhje e theksuar, intolerancë ndaj aktivitetit fizik, tringëllimë në veshë, marramendje dhe mjegullim të trurit.

Sipas të dhënave paraprake, simptomat mund të shfaqen muaj apo vite pas vaksinimit fillestar dhe dozave përforcuese. Gjatë analizimit të mostrave të gjakut të 42 individëve me PVS dhe 22 të tjerëve pa simptoma, studiuesit zbuluan ndryshime në qelizat imune, përfshirë nivele më të ulëta të qelizave CD4+ T dhe më të larta të CD8 T me TNF-alpha.

Në disa raste, është vërejtur prani e proteinës spike të COVID-19 në gjak, çka sipas studiuesve mund të shpjegojë një pjesë të simptomave afatgjata. Megjithatë, jo të gjithë pacientët me PVS kishin nivele të matshme të kësaj proteine, ndaj shkencëtarët theksojnë se mekanizmi mbetet ende i paqartë.

Një tjetër gjetje është riaktivizimi i virusit Epstein-Barr, i cili mund të japë simptoma të ngjashme me gripin dhe shqetësime nervore. Ky virus qëndron latent në trup për vite dhe mund të riaktivizohet në kushte të caktuara, siç është dobësimi i sistemit imunitar.

Dr. Akiko Iwasaki dhe Dr. Harlan Krumholz, dy nga autorët kryesorë të studimit, deklaruan se puna është ende në fazat fillestare dhe kërkon verifikim të mëtejshëm, por mund të çojë drejt zhvillimit të mjeteve diagnostikuese dhe trajtuese për këtë sindromë.

Në një analizë krahasuese, studiuesit përfshinë edhe 134 persona të vaksinuar pa simptoma dhe 134 të tjerë me “long COVID”, për shkak të ngjashmërisë së shenjave klinike. Në të dy grupet u vu re riaktivizimi i virusit Epstein-Barr dhe prani e proteinës spike.

Në të njëjtin kontekst, të dhëna të publikuara më herët nga Instituti Kombëtar i Shëndetësisë në SHBA tregojnë një rritje të konsiderueshme të rasteve të miokarditit pas vaksinave mRNA. Në vitin 2021, rastet e raportuara në sistemin VAERS ishin 223 herë më të larta sesa mesatarja historike për të gjitha vaksinat e kombinuara në 30 vitet e fundit. Rreth 76% e këtyre rasteve kërkuan kujdes urgjent ose shtrim në spital, ndërsa 3% përfunduan me humbje jete.

Studiuesit e Yale theksojnë se këto rezultate janë paraprake dhe jo përfundimtare. Hapi i ardhshëm i kërkimit është identifikimi i grupeve më të rrezikuara dhe përcaktimi i përhapjes së kësaj gjendjeje.