Një traget me rreth 280 persona në bord është përfshirë nga flakët në brigjet e Indonezisë, duke shkaktuar panik dhe dëshpërim mes pasagjerëve, shumë prej të cilëve janë detyruar të hidhen në det për të shpëtuar.

Ngjarja ndodhi rreth orës 13:30 me orën lokale në afërsi të ishullit Talise, në rajonin e North Minahasa.

Trageti me emrin KM Barcelona po kryente itinerarin Manado–Tahuda dhe ishujt përreth, kur shpërtheu zjarri. Pamjet që po qarkullojnë në rrjetet sociale tregojnë anijen e përfshirë tërësisht nga flakët dhe tym i dendur gri që ngrihej mbi mjetin lundrues.

Në një prej videove, një grua dëgjohet duke qarë ndërsa dhjetëra pasagjerë me jelekë portokalli ndodhen buzë anijes dhe më pas hidhen në det. Në një tjetër video, një burrë mban në krahë një fëmijë të vogël të shpëtuar nga uji dhe përshkruan situatën që sapo ka kaluar.

Një pasagjer, Abdul Rahmad Agu, ka publikuar një video në Facebook ku dëgjohet duke kërkuar ndihmë: “Po digjemi në det… na ndihmoni… shpejt…”.

Autoritetet indoneziane kanë nisur operacionet e kërkim-shpëtimit, me tre anije të tjera që janë dërguar menjëherë në vendngjarje: KM Barcelona III, KM Venecian dhe KM Cantika Lestari 9F. Trageti ishte planifikuar të mbërrinte në portin e Manados kur ndodhi incidenti.

Për momentin nuk janë raportuar viktima, por ekipet e emergjencës po punojnë për të gjetur dhe shpëtuar të gjithë pasagjerët. Familjarët janë udhëzuar të qëndrojnë të qetë dhe të presin njoftimet zyrtare.

Vetëm pak ditë më parë, një ngjarje tjetër tragjike ndodhi në Vietnam, ku një anije turistike me 53 persona u përmbys në Halong Bay si pasojë e motit të keq, duke lënë të paktën 38 të vdekur dhe disa të zhdukur.