Një ngjarje e rëndë ka ndodhur mbrëmjen e kaluar në zonën turistike të Skelës në Vlorë, ku një kamarier i një hoteli të njohur është sulmuar fizikisht dhe verbalisht nga një ish-efektiv policie dhe një person me të kaluar kriminale, gjatë orarit të punës dhe në prani të klientëve të shumtë.

Sipas burimeve për JOQ ALBANIA, Ardian Isufi, ish-shef i qarkullimit rrugor në Vlorë, së bashku me Leart Bimon, person me precedent penal të njohur, kanë ushtruar dhunë ndaj kamarierit të ri, për shkak të një shisheje uji të sjellë më tepër në tavolinë.

Sipas dëshmitarëve okularë, Isufi ka filluar përplasjen me kërcënime verbale dhe kontakt fizik ndaj kamarierit, ndërsa më pas Bimo ka kaluar në goditje të përsëritura fizike, duke i shkaktuar të riut lëndime serioze dhe gjendje të rënduar emocionale.
Ngjarja ka ndodhur para syve të dhjetëra klientëve, vendas dhe të huaj, të cilët, të tmerruar nga skena, janë larguar menjëherë nga lokali.

Dëshmitarët raportojnë se viktima është ndihmuar nga kolegët dhe klientët për të shmangur përshkallëzimin e mëtejshëm të dhunës, ndërsa autorët janë larguar nga vendngjarja pa asnjë ndërhyrje të menjëhershme nga autoritetet.

Kjo ngjarje ngre alarmin për përshkallëzimin e dhunës në hapësira publike dhe për lidhjet shqetësuese mes strukturave të sigurisë dhe individëve me të kaluar kriminale.

Burime jozyrtare dyshojnë se incidenti mund të ketë qenë i organizuar me qëllim intimidimi apo sabotimi ndaj biznesit, duke vënë në rrezik sigurinë publike dhe reputacionin turistik të qytetit.

https://www.facebook.com/share/r/1GKywukbGi/

https://www.facebook.com/reel/1072176371241874