Gjatë muajve të verës, ndarja e çifteve shqiptare është një fenomen që vihet re shpesh, dhe sipas ekspertëve të marrëdhënieve, kjo nuk është rastësi.

Sociologia dhe ekspertja e komunikimit Edlira Gjoni shpjegon se vera sjell me vete një ndryshim të ritmit jetësor dhe emocional.

“Gjatë verës njerëzit ndihen më të lirë, ekspozohen më shumë në shoqëri, janë më aktivë në rrjete sociale, udhëtojnë më shpesh dhe në shumë raste, rikthejnë fokusin te vetja,” thotë ajo.

Ky intensitet emocional dhe rritja e ekspozimit social, shpesh sjell edhe një rishikim të marrëdhënieve.

Pushimet zbulojnë probleme që gjatë rutinës së vitit mund të jenë anashkaluar. Bashkëjetesa më e gjatë gjatë pushimeve, që zakonisht mendohet se forcon lidhjen, mund të nxjerrë në pah edhe mospërputhje që deri atëherë janë neglizhuar.

Një tjetër faktor është krahasimi. Me rrjetet sociale që gjatë verës janë plot me foto udhëtimesh, romancash dhe “perfeksioni”, shumë persona i vënë më shumë në pikëpyetje marrëdhëniet e tyre, duke e krahasuar jetën e tyre me atë që shohin te të tjerët.

Për shumë çifte që kanë pasur kriza të pashprehura, vera vepron si një katalizator: ose për të rindezur marrëdhënien, ose për ta mbyllur përfundimisht.

Ndaj, sipas ekspertëve, ndarjet gjatë verës nuk janë domosdoshmërisht pasojë e një momenti impulsiv, por shpesh janë kulmimi i moszgjidhjeve të mëparshme, të cilat bëhen më të dukshme kur jeta del nga rutina.