Një turist britanik ka ndërruar jetë në Turqi në mënyrë tragjike pasi iu nënshtrua një transplanti flokësh, ndërsa autoritetet turke kanë nisur një hetim penal ndaj klinikës private ku u krye ndërhyrja.
Sipas mediave britanike, 38-vjeçari kishte fluturuar drejt Stambollit dhe iu nënshtrua një operacioni që zgjati rreth pesë orë, në klinikën CINIK, në lagjen Beşiktaş. Por pas ndërhyrjes, gjendja e tij shëndetësore u përkeqësua rëndë dhe u dërgua me urgjencë në spital.
Fatkeqësisht, pavarësisht ndërhyrjes së mjekëve, ai ndërroi jetë. Trupi i tij është dërguar në Institutin e Mjekësisë Ligjore për autopsi, përpara se të rikthehet në Britani.
Policia turke ka nisur hetimet, duke e trajtuar rastin si vrasje nga pakujdesia. Sipas mediave vendase, janë marrë në pyetje stafi i klinikës, përfshirë kirurgun, anestezistin dhe infermierët.
Një zëdhënës i Ministrisë së Jashtme britanike konfirmoi vdekjen dhe deklaroi: “Po mbështesim familjen e britanikut që ndërroi jetë në Turqi dhe jemi në kontakt me autoritetet lokale”.
Turqia është kthyer në një qendër botërore për transplantet e flokëve, duke realizuar gati 60% të ndërhyrjeve në shkallë globale. Më shumë se 1 milion pacientë udhëtojnë çdo vit drejt këtij vendi për trajtime të tilla, falë çmimeve të ulëta dhe ofertave që përfshijnë operacionin dhe akomodimin.
Por ky boom i “turizmit mjekësor” po shoqërohet me rritje të rasteve tragjike. Vetëm vitin e kaluar, Anne Towlson, një nënë 58-vjeçare nga Britania, ndërroi jetë pasi iu nënshtrua një ndërhyrjeje estetike në një spital tjetër në Stamboll. Ajo kishte planifikuar një liposuksion dhe ndërhyrje në bark, por mjekët e bindën që në moment të fundit të bënte edhe një ngritje krahu. Ajo zhvilloi komplikacione serioze dhe nuk mori ndihmën e nevojshme në kohë.
Ndërkohë, një tjetër britanik, Luke Horsfield, 26 vjeç, mbeti me plagë dhe zona pa flokë pas një transplant të pasuksesshëm në një klinikë tjetër të Stambollit. Ai u shpreh se ndjehej më keq pas ndërhyrjes dhe mezi arriti të marrë një rimbursim të pjesshëm, ndërkohë që u detyrua të riparojë dëmet në një klinikë në Britani.
Këto raste po ngrejnë alarmin për rreziqet që fshihen pas ofertave “tunduese” të klinikave në Turqi, ku jo gjithmonë kontrolli dhe cilësia përputhen me çmimin.
