Një reportazh i publikuar nga media britanike “Daily Mail” hedh dritë mbi fenomenin alarmant të emigrimit masiv të burrave dhe djemve nga qyteti i Hasit drejt Mbretërisë së Bashkuar.

Sipas artikullit, vetëm në vitin 2022, mbi 13,000 shqiptarë përfshirë edhe adoleshentë kanë hyrë ilegalisht në Britani me gomone, me bindjen se do të gjejnë mundësi të pafundme për fitim, kryesisht në tregun e zi. Në kulmin e eksodit, 4 në 10 emigrantë me gomone ishin nga Shqipëria dhe nga asnjë vend nuk ishte më i madh largimi sesa nga Hasi, një komunë me vetëm 5,000 banorë.

Largimi masiv i meshkujve ka krijuar një shoqëri të pabarabartë në Has, ku shumë familje udhëhiqen nga gratë dhe ku fëmijët rriten pa praninë e baballarëve, të cilët i shohin vetëm përmes ekranit të telefonit. Vajzat adoleshente në qytet kalojnë kohën në kafenetë lokale pa asnjë perspektivë, ndërsa djemtë u thonë mësuesve “shihemi në Londër” para se të lënë shkollën. Raporti thekson se 8 në 10 familje në këtë zonë mbijetojnë vetëm falë të ardhurave të dërguara nga emigrantët në Britani, por çmimi social është i lartë ndarje familjare, rritje e divorceve dhe mungesë figurash prindërore.

Historia e Besmirës, një grua e re në Has, e cila prej katër vitesh nuk e ka parë burrin e saj Arbenin që punon në një kantier ndërtimi në Manchester, është një nga shumë të tilla që përshkruan këtë realitet të hidhur. Ndërsa komuniteti lokal përpiqet të krijojë alternativa për të ndalur këtë eksod përfshirë ndërtimin e një “fshati turistik” për të ofruar punësim sfida demografike dhe sociale mbetet e madhe. Emigrimi i burrave është kthyer në plagën e heshtur të Hasit, një reflektim i qartë i asaj që po ndodh edhe në zona të tjera të Shqipërisë.