Një rit tradicional që synon të shënojë kalimin nga fëmijëria në burrëri ka rezultuar fatal për dhjetëra të rinj në Afrikën e Jugut. Të paktën 39 djem kanë humbur jetën pas një ceremonie masive synetllëku, ndërsa dhjetëra të tjerë kanë mbetur të dëmtuar rëndë.

Ceremonia e njohur si Ulwaluko, e cila zhvillohet çdo verë, ka qenë prej kohësh objekt kritikash për shkak të numrit të lartë të vdekjeve që shkakton çdo vit. Edhe këtë vit, pas sezonit të vitit 2025, raportohen dhjetëra humbje jete dhe deformime të rënda fizike.

Ulwaluko është një rit i trashëguar, i konsideruar si një hap i domosdoshëm për të kaluar nga mosha e djalërisë në atë të burrërisë brenda disa komuniteteve tradicionale. Por praktikat e ndjekura shpesh lënë pas pasoja tragjike, për shkak të mungesës së kushteve higjienike dhe trajtimit mjekësor profesional.

Zyrtarë qeveritarë të Afrikës së Jugut fajësojnë shkollat ilegale të iniciimit, të cilat shpesh funksionojnë jashtë çdo kontrolli dhe përdorin persona të pa trajnuar për të kryer synetllëqet.

Kritikët e këtyre ceremonive theksojnë se jeta e qindra djemve vihet në rrezik çdo vit përmes procedurave të rrezikshme, të kryera pa standarde mjekësore, duke sjellë pasoja të parikuperueshme.