Një 12-vjeçar i huaj ka mbetur i p lagosur këtë të mërkurë pas një hedhjeje të rrezikshme në det, në zonën e thellë të Gjirit të Gramës. I mituri është përplasur me shkëmbin gjatë zhytjes, duke pësuar dëmtime serioze në kokë.

Ngjarja ka alarmuar autoritetet kufitare, të cilat në koordinim me ekipin e urgjencës mjekësore, ndërhynë menjëherë për ta transportuar fëmijën drejt spitalit. Ai ndodhej në zonë bashkë me prindërit, ndërsa ndihma e parë iu dha në vendngjarje, përpara se të dërgohej në spital, ku ndodhet jashtë rrezikut për jetën.

Policia Kufitare Dhërmi deklaron se fëmija është ndihmuar me mjet lundrues, për shkak të aksesit të vështirë në terren. Drejtoria Rajonale e Kufirit në Vlorë u bën thirrje pushuesve që vizitojnë zona të izoluara si Gjiri i Gramës, të tregojnë kujdes të shtuar, pasi mungesa e rrjetit celular dhe vështirësitë në ndërhyrje e bëjnë të rrezikshme çdo incident.

Autoritetet këshillojnë shmangien e veprimeve të pamenduara, si hedhjet nga shkëmbinjtë, dhe marrjen e masave paraprake për sigurinë personale gjatë eksplorimit të plazheve të egra.