Mes situatës alarmante nga zjarret në Delvinë, ku flakët po përhapen me shpejtësi duke rrezikuar zonat e banuara, një banore e quajtur Miranda, ka zgjedhur të mos largohet nga shtëpia e saj. Ajo thotë se nuk mund ta braktisë banesën ku ruan gjithë kujtimet e jetës së saj.

“Më dhimbset shtëpia… Kam kujtimet e mia këtu. Jam për pushime, më bërtasin të gjithë të iki, por nuk iki dot. Me dhimbset, si të iki?”, tha ajo për mediat.

Miranda është një nga dhjetëra banorët që ndodhen ende në zonë, ndërkohë që shumë të tjerë janë evakuuar natën për shkak të flakëve që rrethuan qytetin. Ajo kritikon autoritetet për mungesën e reagimit në kohë, veçanërisht mungesën e ndërhyrjes ajrore që mund të ndalte përhapjen e flakëve masive.

Ditën e sotme, Ministria e Mbrojtjes ka dhënë urdhër për evakuimin e menjëhershëm të banorëve nga fshatrat Nartë, Skënderbegas (Gramsh) dhe Delvinë pasi një vatër e re zjarri është aktivizuar në një kodër shumë pranë zonave të banuara. Era e fortë po ndihmon përhapjen, duke rrezikuar banesat përreth dhe banorët që ende nuk janë larguar.