Momente të dhimbshme janë regjistruar në spitalin e Korçës, ku u dërgua pa shenja jete 14-vjeçari Erald Xhejo pas një konflikti me një moshatar në fshatin Pirg të Maliqit.
Në pamjet e publikuara në media dëgjohet nëna e viktimës, e cila mes dëshpërimit dhe lotëve thërret: “Më lini të shoh djalin për herë të fundit”. Forcat e policisë, të vendosura në hyrje të spitalit, nuk e lejuan hyrjen e saj në dhomën ku ndodhej trupi i të miturit.
Sipas burimeve, edhe autori i dyshuar, Enedio Guri, po 14 vjeç, është shtruar në të njëjtin spital pasi ka marrë plagë gjatë përleshjes. Të dy adoleshentët ishin nxënës të së njëjtës shkollë dhe një ditë para ngjarjes kishin debatuar në rrjetet sociale.
Mëngjesin e sotëm ata janë takuar pranë një lokali në fshat për t’u “sqaruar”, por debati është përshkallëzuar në përdorimin e thikave. Si pasojë, njëri prej tyre humbi jetën, ndërsa tjetri ndodhet nën mbikëqyrjen e policisë.
