Ky që shikoni është Jetmir Pepa nga Belshi, i cili ka humbur kontaktet me familjen e tij që prej vitit 2009.

Vëllai i tij Aliu por edhe pjesëtarë të tjerë të familjes nuk kanë ndaluar së kërkuari vëllain e tyre, por deri më sot që kanë kaluar 16 vite nga kontakti i fundit, ata nuk kanë mundur ta gjejnë dot.

Familjarët e kanë kërkuar në emisione të ndryshme televizive, e kanë kërkuar nëpërmjet policisë, por pa asnjë rezultat.

“Kontakti i fundit ka qenë në vitin 2009. E kam kërkuar në emisione, thoshin njerëzit “e pamë këtu”, “e pamë atje”, por asgjë nuk dimë për të. Shteti na mban me gënjeshtra. Nëse është e mundur publikojeni këtë foto”, shkruan vëllai me shpresën e pashuar se një ditë do bashkohet me Jetmirin.

Jetmiri mbaroi studimet e larta për “Menaxhim Ndërtimi” në universitetin “Aleksandër Moisiu” në Durrës. Pas studimeve ai i tha familjarëve se do të shkonte për të punuar kamarier në një lokal në ‘Qytetin Studenti’ në Tiranë.

Prej asaj kohe çdo kontakt me Jetmirin u ndërpre dhe ai u zhduk pa gjurmë. Kushdo që mund të ketë informacion për vendndodhjen e tij, numri i familjarëve është ky: +355 68 64 10 804.