Pas 19 ditësh kërkime intensive, autoritetet turke kanë gjetur në një thellësi prej 68 metrash trupin e biznesmenit Halit Yukay, jahti i të cilit ishte zbuluar më herët gjysmë i fundosur dhe i dëmtuar pranë brigjeve të Artaki, në Detin e Marmarasë.

Ngjarja nisi më 4 gusht, kur Yukay lundroi i vetëm nga Gialova drejt Mykonos me varkën e tij “GrayWolf”. Po atë ditë, familjarët humbën kontaktet me të dhe njoftuan autoritetet. Një ditë më vonë, një anije tregtare që kalonte pranë Turanköy raportoi se kishte parë pjesë të jahtit të fundosura në det.

Që prej atij momenti, nisi një operacion i gjerë kërkimi ku morën pjesë forcat e Rojës Bregdetare, njësitë speciale të policisë detare dhe zhytës ushtarakë nga disa qytete. Pas shumë ditësh pa rezultat, trupin e biznesmenit e gjetën zhytësit në pikën ku ishte zbuluar edhe jahti, duke përdorur sonar dhe robot nënujor (ROV) për identifikimin.

Halit Yukay, i njohur në qarqet e biznesit dhe mik i ngushtë i aktorit të famshëm turk Kıvanç Tatlıtuğ, pritet të nxirret nga deti përmes një sistemi të posaçëm “ashensori”, në mënyrë që procesi të kryhet me kujdes dhe siguri.

Operacioni i zhytësve ushtarakë pritet të përfundojë brenda orëve në vijim.