Një parukiere në Tiranë ka ndarë përvojën e saj personale, duke treguar se është detyruar të heqë dorë nga shërbimi i thonjve në sallon, pas komplikacioneve shëndetësore të shkaktuara nga produktet që përdorte çdo ditë. Ky rrëfim vjen pasi BE ndaloi manikyr-xhelin për shkak të një përbërësi toksik që mund të ndikonte në fertilitet.

Ajo shprehet se prej dy muajsh nuk ofron më këtë shërbim, pasi vuante nga kruajtje të lëkurës, dhimbje të forta stomaku dhe gastrit, të cilat, sipas analizave të kryera në QSUT, rezultuan të lidhen drejtpërdrejt me produktet e thonjve.

DENONCIMI

“Përshëndetje. Unë jam parukiere dhe u bënë 2 muaj që e kam hequr fare shërbimin e thonjve në sallon për shkak të komplikacioneve shëndetësore që më jepnin. Kruarje lëkure, gastrit në stomak nga pluhurat dhe aromat. Isha përditë me dhimbje stomaku. Bëra testin e alergjisë në QSUT.

Nuk i thashë doktorit çfarë pune bëja se e dija që do më thoshte: “E ke nga profesioni.” Dhe rezultati doli që problemi ishin produktet e thonjve. E kuptoj që shumë goca dhe gra ngelen pa punë, por më e rëndësishme është shëndeti. Të mendojnë për veten dhe fëmijët.

Do bëjnë një punë tjetër, fundi i një pune shërben si fillim i një pune më të mirë. U çudita edhe vetë kur lexova që elementi nr. 7 ishte shkaktari i problemeve të mia. Sado cilësore të jenë produktet, të japin dhimbje koke pas disa orësh pune, dhe aspiratorët që thithin pluhurin e thithin nga lart dhe e shpërndajnë anash.

Të mos flasim pastaj për higjienën e pajisjeve, se nuk dua të kaloj në temë tjetër e të akuzoj koleget. Se me këto çmime që i punojnë, nuk del kosto produkti dhe dezinfektim, e pastaj të mendojnë për fitime të ngelura.”