Një tragjedi ka ndodhur në provincën veriore të Giresunit, në Turqi, ku një dhëndër 23-vjeçar humbi jetën aksidentalisht gjatë dasmës së tij, pas një të shtëne me armë në shenjë festimi.
Sipas raportimeve të mediave turke, përfshirë “Milliyet”, viktima ndërroi jetë këtë mëngjes, vetëm një ditë pas ceremonisë martesore.
Autoritetet kanë arrestuar motrën e nuses, e cila është kunata e dhëndrit dhe dyshohet si personi përgjegjës për të shtënën fatale. Rasti është duke u hetuar.
Ngjarje të tilla nuk janë të rralla në Turqi, ku tradita e të shtënave me armë gjatë festimeve mbetet ende e përhapur, pavarësisht paralajmërimeve nga autoritetet.
Sipas një organizate lokale, në Turqi qarkullojnë rreth 40 milionë armë zjarri, shumica pa leje. Vetëm një javë më parë, një tjetër dasmë në Trabzon përfundoi me një të vdekur dhe dy të plagosur nga të shtënat me armë.
