Sezoni i verës, kthimi i emigrantëve dhe dasmat që organizohen kudo në vend, po sjellin një fluks të pazakontë pacientësh në urgjencën e spitalit rajonal të Fierit. Por ndryshe nga vitet e kaluara, këtë herë nuk janë helmimet nga ushqimi shqetësimi kryesor, por abuzimi masiv me alkoolin.

Sipas mjekëve, vetëm gjatë ditëve të fundit, urgjenca ka trajtuar deri në 200 pacientë në ditë, ndërkohë që pothuajse gjysma e tyre ishin qytetarë të moshave të reja që kanë përfunduar në spital për shkak të konsumit të tepruar të alkoolit.

Bluzat e bardha pohojnë se shumica e rasteve vijnë pas festave familjare, kryesisht dasma, ku përdorimi i alkoolit tejkalon çdo kufi. Të rinjtë përbëjnë grupin më të rrezikuar, ndërsa ndihma mjekësore kërkohet vetëm kur simptomat bëhen të rënda.

Megjithëse nuk janë shënuar raste të helmimeve masive nga ushqimi, numri i qytetarëve që kanë përfunduar në spital për shkak të alkoolit është gjithnjë e në rritje, çka po kthehet në një fenomen shqetësues shëndetësor dhe social.

Mjekët apelojnë për vetëpërmbajtje dhe ndërgjegjësim, sidomos tek të rinjtë, për të shmangur rreziqet serioze që lidhen me abuzimin me pijet alkoolike, që në raste të caktuara mund të jenë edhe fatale.