Ditën e djeshme, kryeministri u shfaq në një emision televiziv ku foli me pasion për aksionin e lirimit të plazheve dhe kthimin e tyre në hapësira publike. Një mision që në letër duket i madh, por në terren, këtë verë, nuk është marrë edhe aq seriozisht nga bizneset që vazhdojnë të mbajnë “nën kujdes” çdo centimetër rëre.

I pyetur për situatën, Rama deklaroi me plot gojë se biznesmenët në Ksamil dhe Dhërmi duhet ta harrojnë zonën e plazhit, pasi menaxhimi i tyre do të kalojë në dorë të bashkive përkatëse. Me pak fjalë, qytetarët duhet të gëzohen se çadrat dhe shezlongët nuk do të jenë më pronë private, por pronë “publike” nën menaxhimin e pushtetit lokal. Ironia është se qytetarët shpesh nuk shohin dallim të madh sepse në të dyja rastet e vetmja gjë pa pagesë është rëra.

Deklarata e famshme “Ksamili nuk është plazhi i Durrësit” tingëlloi si një krahasim për të dhënë siguri, por gjithsesi i la qytetarët me një pyetje të thjeshtë: a do të thotë kjo që plazhi do të jetë më i lirë, apo thjesht do të ndryshojë kush vendos çmimin?

Në fund, ndërsa verë pas vere premtimi për “plazhe të lira” përsëritet si refren, qytetarëve u mbetet të shpresojnë që këtë herë ironia të mos dalë më e fortë se realiteti.