Një deklaratë e pazakontë nga senatori amerikan John Ke nnedy, nga shteti i Luizianës, ka tërhequr vëmendje të madhe mediatike dhe publike në SHBA. Ai ka paralajmëruar për rreziqet që vijnë nga konsumimi i karkalecave të ngrirë të importuar, të cilët ai i quajti “radioaktivë”.

Në një reagim plot ironi, Kennedy tha se këto produkte mund të shkaktojnë pasoja të çuditshme, si për shembull që njerëzit të fillojnë të duken si “alienë” apo siç tha ai, “t’ju rritet një vesh shtesë”.

Senatori e shoqëroi paralajmërimin e tij me një poster të filmit të famshëm horror-shkencor “Alien” (1979), duke theksuar:

“Zoti President, kjo është një fotografi nga filmi Alien. Kështu mund të përfundoni nëse hani disa nga karkalecat e ngrirë të papërpunuar që importohen në SHBA.”

Sipas Kennedy, karkalecat e importuar nga Indonezia përmbanin izotopin radioaktiv cezium-137, i cili, sipas tij, është tejet i rrezikshëm për shëndetin.

“Edhe nëse nuk të kthen në alien, të siguroj që do të të rritet një vesh shtesë”, – shtoi senatori me një ton ironik.

🔬 FDA (Administrata Amerikane e Ushqimit dhe Barnave) kishte zbuluar gjurmë të kësaj substance në disa lote të karkalecave të ngrirë që tashmë ishin shpërndarë në rrjetin e supermarketeve Walmart, në 13 shtete amerikane:

Alabama, Arkansas, Florida, Georgia, Kentucky, Luiziana, Missouri, Mississippi, Ohio, Oklahoma, Pennsylvania, Teksas dhe Virxhinia Perëndimore.

Ndërkohë që autoritetet po hetojnë dhe kërkojnë tërheqjen nga tregu të këtyre produkteve, Kennedy ka bërë thirrje për kujdes maksimal ndaj konsumatorëve, duke kërkuar masa më të forta sigurie ushqimore për importet.