Cikloni më i ri sekondar i krijuar në veri të Italisë ka filluar të kushtëzojë reshje shiu të cilat në orët në vazhdim do të fuqizohen dhe intensifikohen.

Përpos Italisë kur priten reshje të dendura shiu dhe lokalisht shtrëngata të fuqishme shiu me bubullima të mëdha, shiu do të fillojë në Slloveni duke u fuqizuar orëve të ardhshme.

Shumë shpejt edhe pjesë të Kroacisë do të përfshihen nga reshje shiu e stuhi lokale të fuqishme me vetëtima dhe bubullimë. Shtrëngata të forta priten sidomos në viset bregdetare të Kroacisë dhe zonat përreth.

Pas Kroacisë rrebeshe të fuqishme pritet të përfshijnë edhe Hercegovinën dhe Malin e Zi sot pasdite dhe gjatë natës.

Në mbrëmje vonë shirat mund të arrijnë edhe veriperëndimin e Shqipërisë dhe veriun si dhe pjesë të Kosovës ku priten reshje apo rrebeshe kalimtare shiu me ndonjë vetëtimë dhe bubullimë. Shirat sonte në Kosovë nuk do të duhet të zgjasin shumë sipas parashikimeve, por të Enjten priten një valë e reshje dhe rrebeshesh shiu në shumë pjesë të Kosovës, ndërsa në Shqipëri atmosfera e cilat do të destabilizohet sonte gjatë natës do të vazhdojë të Enjten të krijohen stuhi të fuqishme lokale shiu me vetëtima dhe bubullimë ku vende-vende do të ketë rrebeshe shumë intensive shiu.

Destabilizim të atmosferës pritet të ketë edhe në Maqedoninë Veriore të Enjten me stuhi të fuqishme shiu me vetëtima dhe bubullimë, ndërsa stuhi të izoluara mund të krijohen edhe në veri të Greqisë. Impakti në Greqi do të jetë shumë i vogël, sepse stuhitë e fuqishme do të vazhdojnë të rrugëtojnë drejt Bullgarisë dhe Rumanisë.

Pra, një ciklon me frontin e ftohtë do të krijojë kushte për reshje dhe rrebeshe intensive duke filluar nga sot (e Mërkurë) në Slloveni, Kroaci, pjesë të Bosnjë dhe Hercegovinës dhe në Mal të Zi e veriperëndim të Shqipërisë.

E Enjtja pritet të sjellë valë reshjesh dhe rrebeshesh në shumë pjesë të Shqipërisë, Kosovës dhe Maqedonisë së Veriut, vende-vende priten rrebesh mjaft intensive, por edhe kësaj radhe reshje nuk do të jenë të balancuara, prandaj në shumë zona priten rrebeshe mjaft intensive, e në zona tjera më të pakta dhe do të ketë edhe zona ku reshjet mund të jenë krejtësisht simbolike.

Temperaturat do të shënojnë ulje, por menjëherë të Premten pritet mot më i qetë dhe i nxehtë, por me mundësi për reshje të pakta në disa rajone./MeteoBallkan