Një ngjarje e rëndë ka tronditur një familje në Middlesbrough të Anglisë, ku një baba humbi jetën në funeralin e të birit.

Norman White, 61 vjeç, u rrëzua papritur teksa arkivoli i djalit të tij, David Beilicki, po futej në kishën “St Bede’s Chapel”. Ai dyshohet se pësoi një atak kardiak dhe u dërgua menjëherë në spital, por nuk mundi të mbijetonte.

Sipas vajzës së tij, Chantelle Beilicki, Norman nuk kishte pasur më parë probleme me zemrën dhe ajo beson se ai u nda nga jeta “nga dhimbja e madhe e humbjes së djalit”. “Ishte si një skenar filmi, diçka që nuk e përfytyron dot,” tha ajo për mediat britanike.

David, i cili kishte vite që luftonte me varësinë ndaj drogës, ishte gjetur i pajetë më 31 korrik nga një i afërm. Vdekja e tij përkoi me 10-vjetorin e memorialit për dy djemtë e tij binjakë të lindur të vdekur.

Familja e përshkroi Norman-in si një njeri të dashur, sportist dhe trajner boksi, shumë i respektuar nga komuniteti. Ceremonia e varrimit të tij do të mbahet më 18 shtator.