Një tjetër skemë mashtrimi online ka dalë në dritë, këtë herë në qytetin e Gramshit, ku një punonjëse e Shërbimeve Sociale pranë Bashkisë ka rrëfyer se si u bë pjesë e platformës së dyshuar XUEX, duke investuar para të konsiderueshme me shpresën e fitimeve të shpejta.

Punonjësja, me inicialet E.Xh., ka dëshmuar para hetuesve se u njoh për herë të parë me platformën gjatë një dreke festive më 8 mars, ku dy kolege po diskutonin se si mjaftonte të klikonte një “pikë jeshile” në telefon për të gjeneruar fitime online.

E intriguar, ajo vendosi të regjistrohej bashkë me një kolege tjetër, duke investuar 1000 euro kapital fillestar. Pas këtij hapi, sipas saj, arriti të shihte në llogaritë online një shumë prej 3000 eurosh dhe të tjera rreth 5000 euro ende të pashkëputura.

Në dëshminë e saj, punonjësja ka treguar se fillimisht provoi të tërhiqte një shumë simbolike prej 100 USDT, të cilat iu konvertuan në rreth 7600 lekë në bankë, gjë që i dha bindjen se sistemi funksiononte. Pas kësaj, ajo e la shumën tjetër në platformë dhe në llogarinë Binance, ku sipas saj vazhdon të ketë mbi 3000 USDT.

Por historia nuk mbaron këtu. Ajo rrëfen se e ka ndarë linkun e regjistrimit edhe me familjarë të afërt – bashkëshortin, motrën, kunatin dhe të afërm të tjerë. Madje, për të ndihmuar motrën e divorcuar me dy fëmijë, i ka kaluar para nga llogaria e saj, duke besuar se ishte një investim i ligjshëm.

Ndërkohë, Policia e Shtetit ka njoftuar arrestimin e 6 personave dhe shpalljen në kërkim të dy të tjerëve, të dyshuar si të përfshirë në këtë skemë piramidale online, e cila ka përfshirë shumë qytetarë në Gramsh dhe jo vetëm. Hetimet vijojnë për të identifikuar organizatorët dhe për të zbardhur rrjetin e plotë të mashtrimit.