Një 28-vjeçar shqiptar është arrestuar në qytetin Scicli të Italisë, pasi u kap me një pistoletë të vjedhur, municione dhe një thikë.

Ngjarja nisi pas disa telefonatave në numrin e emergjencës 112, ku qytetarët raportuan persona të armatosur që lëviznin në rrugë. Karabinierët ndërhynë menjëherë dhe gjetën shqiptarin të shtrirë në tokë, me plagë në kokë dhe me një armë të mbushur pranë trupit. Ai mbante gjithashtu me vete fishekë të tjerë dhe një thikë, raportojnë mediat italiane.

Hetimet zbuluan se pak më parë kishte ndodhur një sherr mes dy shqiptarëve dhe dy tunizianëve në Largo Gramsci. Për shkaqe ende të paqarta, njëri nga shqiptarët dyshohet se ka hapur zjarr me një armë gjahu, duke lënduar lehtë dy tunizianët. Më pas, ai është larguar dhe ndodhet ende në kërkim, ndërsa 28-vjeçari i plagosur mbeti në vendngjarje.

Të tre të lënduarit morën ndihmën e parë në spitalin “Maggiore” të Modica-s. Armët dhe municionet u sekuestruan nga policia. Pas trajtimit mjekësor, shqiptari u vendos në pranga dhe u dërgua në burgun e Ragusa-s, nën akuzën e mbajtjes së paligjshme të armëve dhe ricettazione-s (përdorim i sendeve të vjedhura). Ndërkohë, bashkëkombësi i tij është i dyshuar për tentativë vrasjeje.