Një apel prekës për ndihmë ka mbërritur në redaksinë e JOQ Albania, ku një vogëlushe vetëm 9-vjeçe tregon mes lotësh vështirësitë e mëdha me të cilat përballet pas humbjes së babait. Arla është jetime prej dy vitesh dhe jeton me të ëmën dhe vëllain e vogël. Nëna e saj përpiqet e vetme të sigurojë të ardhurat për qiranë dhe ushqimin, por shpesh nuk ia del. Për këtë arsye, familja detyrohet të ndërrojë shpesh shtëpi.
E përlotur, Arla tregon me dhimbje se ka ditë kur shkon në gjumë pa ngrënë, jo sepse nuk do, por sepse nuk ka ushqim.
“Babi më ka ndërruar jetë. Më thoshte ‘ti je princesha ime’. Unë kënaqesha me të. Babi ishte jeta ime, drita e syve të mi, më mungon. Kemi vetëm mamin, askush nuk na ndihmon. Shumë herë flejmë pa bukë. Më kërkon vëllai ndonjë ëmbëlsirë, i themi: ‘s’kemi ëmbëlsira’. Dhe i bëj ujë me sheqer. Kemi ngelur me çanta në krahë, edhe këtu do na nxjerrin nga shtëpia se s’ka paguar mami qiranë dhe s’kemi ku të shkojmë.”
Rasti është marrë përsipër nga Fondacioni Firdeus, të cilët kanë hapur një faqe GoFundMe për të ndihmuar vogëlushen jetime dhe familjen e saj.
Kushdo që ka mundësi dhe dëshirë, mund të kontribuojë për t’i lehtësuar jetesën Arlës dhe për t’i dhënë asaj e vëllait të saj një jetë më të qetë dhe më të ngrohtë, ashtu si gjithë bashkëmoshatarët e tyre.
