Frutat, perimet dhe shumë produkte të tjera ushqimore që shiten çdo ditë në tregjet e Durrësit po rezultojnë të kontaminuara me pesticide mbi normat e lejuara, duke ngritur shqetësime serioze për sigurinë ushqimore. Ngarkesa me produkte bujqësore janë ndaluar kohët e fundit në dogana, përfshirë portokalle nga Greqia dhe domate shqiptare, për shkak të përmbajtjes së lartë të mbetjeve kimike. Madje, disa prej tyre janë kthyer mbrapsht nga vendet e Bashkimit Europian.

Pavarësisht kësaj, në tregun e Durrësit këto produkte shpesh përfundojnë në duart e qytetarëve, të cilët shprehen të shqetësuar dhe të pafuqishëm përballë situatës.
“Të sigurta nuk janë, por i blejmë se s’kemi ku të shkojmë. Dikur nuk kishte pesticide, tani i kanë bërë të bukura, por të rrezikshme”, thotë një qytetare.

“Të mos i nxjerrin fare në treg se helmojnë popullin. Qeveria dhe AKU duhet të bëjnë kontrolle të rrepta”, shprehet një tjetër banor.

Qytetarët i kërkojnë Autoritetit Kombëtar të Ushqimit dhe institucioneve të tjera përgjegjëse të jenë më të pranishme në terren dhe të ndërhyjnë për të garantuar sigurinë ushqimore, përndryshe pasojat mund të jenë të rënda për shëndetin publik.