Prizren, 17 Tetor 2025 Prokuroria Themelore në Prizren – Departamenti për Krime të Rënda ka nisur hetimet për një rast të rëndë të dhunës në familje, i cili ka ndodhur pas mesnatës në rrugën “Rexhep Kabashi” në Prizren.

Sipas njoftimit zyrtar, rreth orës 00:20 të mëngjesit, Policia e Kosovës ka marrë informacion për një incident të rëndë në një banesë shumëkatëshe. Në vendin e ngjarjes, efektivët kanë hasur një grua me plagë të shumta të shkaktuara nga një mjet i mprehtë, e cila ndodhej në rrugë dhe po kërkonte ndihmë.

Në ndërtesë është gjetur edhe vajza e mitur e saj, e cila po ashtu kishte lëndime serioze. Të dyja janë dërguar me urgjencë në Spitalin Rajonal të Prizrenit, ku ndodhen në gjendje kritike për jetën, sipas burimeve mjekësore.

Autori i dyshuar i sulmit, bashkëshorti i viktimës, është ndaluar nga policia në hyrje të banesës dhe aktualisht ndodhet në paraburgim. Prokurori kujdestar ka lëshuar urdhër për ndalimin e tij për 48 orë, nën dyshimin për kryerjen e veprës penale “Vrasje e rëndë në tentativë” dhe “Mbajtje të paautorizuar të armës së ftohtë”.

Ndërkohë, njësia e hetimeve dhe forenzikës po punon për zbardhjen e plotë të rrethanave të kësaj ngjarjeje tronditëse.

Prokuroria ka bërë të ditur se brenda afateve ligjore do të paraqesë kërkesën për caktimin e masës së paraburgimit për të dyshuarin.