Një apel prekës ka mbërritur në redaksinë e JOQ Albania për vogëlushin Sadik Mici, vetëm 12-vjeç, i cili po lufton me një sëmundje të rrallë dhe shumë të rrezikshme, sindromën Stevens-Johnson. Sadiku ndodhet në gjendje të rëndë dhe ka nevojë urgjente për trajtim jashtë vendit, pasi në Shqipëri mungojnë kushtet mjekësore për këtë sëmundje.
Sipas familjarëve, vogëlushi pësoi një reaksion të rëndë alergjik pas marrjes të një medikamenti mjekësor. Familja e tij nuk ka mundësi financiare për të përballuar kostot e larta të kurimit, ndërsa Fondacioni Firdeus ka marrë përsipër rastin dhe ka hapur një faqe GoFundMe, ku kushdo që dëshiron mund të dhurojë për të shpëtuar jetën e Sadikut.
Le të bashkohemi të gjithë për ta ndihmuar këtë engjëll të vogël të rifitojë shëndetin dhe buzëqeshjen.
Çdo ndihmë, sado e vogël, mund të bëjë mrekullinë për Sadikun.
Çfarë është sindroma Stevens-Johnson?
Kjo është një sëmundje e rrallë, por shumë serioze, që zakonisht shkaktohet nga reagime të rënda alergjike ndaj barnave ose infeksioneve. Ajo prek lëkurën dhe mukozat, duke shkaktuar plagë të dhimbshme, flluska dhe dëmtime të rënda të organeve të brendshme. Në shumë raste, pacientët kanë nevojë për trajtim intensiv dhe kujdes të specializuar.
