Një qytetar i është drejtuar redaksisë së JOQ Albania me një mesazh shqetësues për tre fëmijë që jetojnë të vetëm në qytetin e Korçës. Sipas informacioneve të përcjella, ata i përkasin komunitetit rom dhe janë vendosur prej rreth pesë muajsh në zonën e njohur si “Te Francezët”, pasi më parë jetonin në Tiranë.

Më e madhja prej tyre është vetëm 11 vjeçe dhe kujdeset për dy vëllezërit e saj më të vegjël. Prindërit e fëmijëve mësohet se kanë ndërruar jetë, ndërsa tre të miturit jetojnë pa asnjë mbështetje familjare apo institucionale.

Kushtet e jetesës janë tepër të vështira, ndërsa fëmijët përpiqen të sigurojnë ushqimin e përditshëm duke lypur në rrugë. Asnjëri prej tyre nuk ka ndjekur shkollën, dhe jetesa në një kasolle e improvizuar mbetet e vetmja mundësi për strehim.

Mesazhi i qytetarit:

Përshëndetje. Doja tju pyesja nëse mund të ndihmojmë 3 fëmijë që sipas asaj që më thanë jetojnë vetëm. Më e madhja që kujdeset për dy të tjerët është 11 vjeç. I përkasin komunitetit rom dhe më thanë se kanë rreth 5 muaj që kanë ardhur nga Tirana dhe rrinë në një kasolle në Korçë ‘Te Francezët’. Nëse keni dikë në Korçë që mund të marrë më shumë informacion, nuk kisha kohë të shkoja ti verifikoja nëse ishin të vërteta të gjitha, por më thanë që prindërit u kishin vdekur të dy. Besoj se ishin të vërteta sepse djali i vogël rreth 3 vjeç i thërriste motrës mami. Dhe kur i pyeta me se jetonin, e pohuan vetë, lypim që të hamë ndonjë gjë. Dhe më thanë që asnjëri nuk kishte shkuar asnjë ditë në shkollë