Gjatë ditës së sotme reshjet do të vijojnë të jenë prezente, kryesisht në zonat qendrore të vendit, ku priten rrebeshe të shkurtra herë pas here. Pjesa tjetër e territorit do të ketë reshje më të pakta dhe me karakter lokal.

Pas mesditës pritet një përmirësim i dukshëm i kushteve të motit në pjesën më të madhe të Shqipërisë. Megjithatë, herë pas here do të ketë prani reshjesh të lehta në zonat qendrore dhe pjesërisht në perëndim, ndërsa në mbrëmje moti do të qetësohet.

E enjtja do të sjellë sërish vranësira të theksuara në veri, të cilat gjatë natës dhe mëngjesit të së premtes do të sjellin rrebeshe të shkurtra në të gjithë territorin. Nga mesdita e së premtes moti përmirësohet gradualisht, duke vijuar i qëndrueshëm edhe gjatë së shtunës.

Fundjava do të jetë kryesisht me kthjellime dhe vranësira kalimtare, me reshje të papërfillshme vetëm në zonat veriore. Temperaturat do të rriten ndjeshëm, duke arritur deri në 28°C të dielën, veçanërisht në jugperëndim.

E hëna parashikohet me rrebeshe të shpeshta në të gjithë vendin, ndërsa në orët e vona të mbrëmjes do të ndodhë një rënie e ndjeshme e temperaturave me 7–8 gradë. Kjo rënie do të pasohet nga rikthimi i reshjeve të dëborës në zonat veriore dhe verilindore të vendit gjatë natës së së hënës dhe ditës së martë.

Pra, Shqipëria do të përjetojë një fundjavë të ngrohtë tipike tetori, për t’u rikthyer më pas në motin e ftohtë të stinës, me reshje shiu e dëbore në veri.,