Autoritetet shqiptare kanë ndaluar sot hyrjen në territorin e vendit të predikuesit të njohur islamik Imran Hosein, i cili është cilësuar si person që përbën rrezik për sigurinë kombëtare. Ngjarja është regjistruar pasditen e së enjtes në aeroportin ndërkombëtar të Rinasit.

Sipas burimeve nga mediat, Hosein ishte nisur nga Trinidad dhe Tobago, me ndalesë në Amerikën e Jugut, dhe kishte planifikuar një vizitë në Shqipëri me një agjendë fetare. Por, pas verifikimeve nga strukturat e sigurisë, rezultoi se ndaj tij kishte informacione të ndjeshme që lidhen me veprimtari të mundshme terroriste.

Për këtë arsye, policia kufitare nuk e lejoi të hyjë në territorin e Republikës së Shqipërisë, ndërsa aktualisht predikuesi mbahet në Rinas, në pritje të procedurave për kthimin e tij në vendin e nisjes.

Kush është Imran Hosein?

Imran N. Hosein është studiues dhe predikues islam nga Trinidad & Tobago, i njohur ndërkombëtarisht për ligjëratat mbi eshatologjinë islame – studimin e shenjave të fundit të kohës – si dhe për komentet e tij mbi politikën globale dhe ekonominë islame.

Ai është autor i disa librave, ndërsa një pjesë e madhe e mësimeve të tij përqendrohet te çështja e Izraelit, të cilin e lidh me ngjarjet profetike të përmendura në Kuran. Pikërisht këto interpretime, shpesh të ngarkuara me teori konspirative, kanë nxitur kritika nga institucione fetare dhe dijetarë islamë që i konsiderojnë të diskutueshme qëndrimet e tij.

Ky është një nga rastet e rralla kur një figurë fetare ndalohet në Shqipëri për arsye sigurie, ndërkohë që autoritetet pritet të japin më shumë detaje mbi arsyet konkrete të këtij vendimi në orët në vijim.