Hetim i ri në qeveri – SPAK zbulon komunikime komprometuese

Në muajin shkurt të vitit 2024, oficerët e Byrosë Kombëtare të Hetimit (BKH) zhvilluan një kontroll në banesën e drejtorit të atëhershëm të ARRSH-së, Ervis Berberi, duke sekuestruar katër telefona celularë, pajisje kompjuterike dhe dokumente që do të bëheshin më vonë pjesë kyçe e një hetimi të gjerë të SPAK-ut.

Ky veprim erdhi pasi prokuroria e Posaçme (SPAK), nën drejtimin e Altin Dumanit, ndryshoi strategjinë hetimore, duke u fokusuar në analizën e komunikimeve private në vend të përgjimeve klasike telefonike.

? Bisedat që çuan te emra të mëdhenj

Gazetari Elton Qyno mëson se pak ditë pas sekuestrimit të pajisjeve, prokurori Dritan Prençi urdhëroi ekspertimin kompjuterik të katër telefonave të sekuestruar.

Rezultatet sollën rikuperimin e një numri të madh bisedash të zhvilluara në platforma elektronike nga Berberi dhe bashkëshortja e tij, Adela Ruko.

Rreth dy muaj më pas, në prill 2024, prokurori Prençi vendosi të hapte një dosje të re (nr. 196), duke zgjeruar hetimet edhe ndaj kryebashkiakut të Shkodrës, Benet Beci.

?? Nga Berberi te Balluku – si u zgjerua hetimi

Ekspertimi i pajisjeve të çiftit Berberi-Ruko rezultoi të ishte “pika e kthesës” që çoi në zbulimin e një rrjeti komunikimesh që përfshinte edhe zv/kryeministren dhe ministren e Infrastrukturës, Belinda Balluku.

SPAK dyshon se këto biseda mund të lidhen me paracaktimin e fituesve në tendera publikë, duke e futur ministren në qendër të një dosjeje të re hetimore.

Sipas burimeve, Balluku pritet të paraçitet këtë javë në SPAK për t’u njohur zyrtarisht me akuzën e “Shkeljes së barazisë në tendera”, që lidhet me një procedurë të zhvilluar në tunelin e Llogarasë, pjesë e autostradës Orikum–Himarë.

?? Tenderi i Llogarasë – 2 milionë euro në lojë

Tenderi, me objekt “Mbikëqyrja e punimeve në tunelin e Llogarasë”, u shpall nga Ministria e Infrastrukturës dhe Energjisë në dhjetor 2021, me një fond limit prej 196 milionë lekësh (rreth 2 milionë euro).

Në garë morën pjesë bashkimi i kompanive “Stucky L.T.D” dhe “Gjeokonsult & CO”, si dhe “Hill International N.V” dhe “Net-Group”, kjo e fundit në pronësi të biznesmenit Valter Begaj, mik i afërt i Ervis Berberit.

Dy kompanitë e para u skualifikuan për mungesë dokumentacioni, duke lënë fituese “Hill International” dhe “Net-Group”, gjë që ka ngritur dyshime për favorizim të qëllimshëm.

Hetuesit dyshojnë se tenderi mund të jetë paracaktuar, me përfshirje të Ervis Berberit, Ervis Lamit, Valter Begajt dhe Belinda Ballukut.

Këto dyshime janë forcuar pas zbërthimit të komunikimeve telefonike, ku del edhe emri i ministres.

Në prill 2025, prokurori Prençi kërkoi nga ARRSH-ja dokumentet e plota të procedurës së tenderit, ndërsa mësohet se SPAK ka regjistruar një dosje të re që pritet të çojë në akuzë penale disa zyrtarë të tjerë të ministrisë dhe anëtarë të Komisionit të Vlerësimit të Ofertave.

??‍?? Çfarë pritet të ndodhë tani

Burime nga prokuroria konfirmojnë se brenda prillit 2026, SPAK do të dërgojë në gjykatë të gjithë personat e përfshirë në këtë hetim, përfshirë edhe kryebashkiakun Benet Beci, Adela Rukon, si dhe disa drejtues të KESH-it dhe Ministrisë së Infrastrukturës.

Ndërkohë, gjithë vëmendja është te paraqitja e Belinda Ballukut në SPAK, ku pritet të sqarohen rrethanat e përfshirjes së saj në këtë dosje që po trondit majat e qeverisë,