Kreu i SPAK, Altin Dumani u është përgjigjur sot në Kuvend disa pyetjeve të drejtuara ndaj tij nga deputetët e opozitës.

Dumani u ndal edhe te pyetja mbi ekzistencën e familjeve mafioze në Shqipëri.

Dumani u shpreh se lufta kundër krimit të organizuar është ndër arritjet e SPAK-ut, pasi ndër vite janë kryer hetime të suksesshme në këtë fushë, me seriozitet dhe profesionalizëm, edhe në bashkëpunim me agjencitë e huaja.

Kreu i SPAK nënvizoi se në këtë luftë me krimin e organizuar nuk duhet harruar niveli i sofistikimit që ka pësuar kjo fushë ndër vite.

“Sa i takon rezultateve të SPAK nga lufta kundër krimit të organizuar, një nga gjërat për të cilat duhet të ndihet krenare është pikërisht kjo luftë sepse edhe falë bashkëpunimit me agjencitë europiane, vendet në rajon, SHBA dhe Amerikën Latine, kemi kryer hetime të suksesshme. Është besim që na është dhënë se e kemi merituar se kemi treguar sa seriozë dhe profesionistë jemi në hetimet tona. Ju jap një shifër. Nga 2004-2019 janë trajtuar rreth 718 subjekte. Niveli i sofistikimi të krimit të organizuar nuk mund të krahasohet me sot se është shumë dinamik. Duhet vlerësuar ky bashkëpunim”,-tha Dumani.