Një aksident i rëndë me pasoja tragjike ka ndodhur në mëngjesin e sotëm, më 29 tetor, në Piavon di Oderzo, përgjatë rrugës Maggiore di Piavon, në provincën e Trevisos, Itali.

Rreth orës 07:30, një autobus ATVO që transportonte dhjetëra studentë të institutit “Sansovino” u përplas me një SUV Hyundai, duke shkaktuar vdekjen e menjëhershme të shoferit të mjetit të vogël dhe plagosjen e pesë studentëve, si dhe lëndimin e 15 të tjerëve.

Viktima është Germano De Luca, 85 vjeç, nga Fregona, i cili po drejtonte SUV-në në momentin e përplasjes. Sipas të dhënave paraprake, ai nuk kishte leje drejtimi të vlefshme, pasi i ishte pezulluar më 15 tetor pas skadimit në gusht, për arsye shëndetësore. Dyshohet se De Luca ka pësuar një shqetësim të papritur shëndetësor dhe ka kaluar në korsinë e kundërt, duke shkaktuar përplasjen fatale.

Autobusi, që kishte nisur udhëtimin nga San Donà di Piave me destinacion shkollat në Oderzo, pas përplasjes përfundoi në një kanal anës rrugës. Shoferi i autobusit u plagos lehtë, por arriti të ruajë qetësinë dhe të hapë daljen e emergjencës në çati, duke ndihmuar studentët të dalin jashtë në siguri.

Në vendngjarje mbërritën menjëherë Zjarrfikësit e Motta di Livenza, ekipe mjekësore me ambulanca dhe helikopterin Suem 118, si dhe Karabinierët e Cessalto-s që kryen veprimet hetimore dhe devijuan trafikun.

Pavarësisht ndërhyrjes së shpejtë të ekipeve të emergjencës, për 85-vjeçarin nuk mund të bëhej asgjë. Prokuroria e Trevisos ka hapur një hetim dhe pritet të kryhet autopsia për të përcaktuar nëse shkaku i aksidentit ishte një sëmundje e papritur apo gabim njerëzor.

Sipas mediave italiane, aksidenti ndodhi në një segment të ngushtë dhe me kthesa, ku automjetet përfunduan jashtë rruge në anë të kundërta. Ngjarja ka tronditur komunitetin lokal, ndërsa autoritetet italiane kanë vlerësuar reagimin e shpejtë të shoferit të autobusit që parandaloi një tragjedi më të madhe.