Komiteti Disiplinor i FIFA-s ka dënuar Federatën e Futbollit të Serbisë për sjelljen e papërshtatshme dhe diskriminuese të tifozëve gjatë ndeshjes kundër Shqipërisë, e zhvilluar më 11 tetor në qytetin e Leskovcit. Sipas njoftimit zyrtar, federata serbe është gjobitur me 87,500 franga zvicerane (rreth 93,981 euro) për thirrjet fyese dhe sjelljet e pahijshme të tifozëve gjatë intonimit të himnit shqiptar, si dhe për veprime të konsideruara diskriminuese gjatë gjithë ndeshjes.

Përveç dënimit financiar, FIFA ka urdhëruar edhe mbylljen e pjesshme të stadiumit, në të paktën 25% të kapacitetit të ulëseve, për ndeshjen e ardhshme kualifikuese që Serbia do të zhvillojë kundër Letonisë, po në stadiumin e Leskovcit. Gjatë ndeshjes ndaj Shqipërisë, një pjesë e tifozëve serbë u dëgjuan duke bërë thirrje ofenduese, nacionaliste dhe fashiste ndaj shqiptarëve dhe Kosovës, duke krijuar një atmosferë armiqësore në stadium. Ky veprim është cilësuar si shkelje e rëndë e rregullave të sjelljes së tifozëve në kompeticionet ndërkombëtare.

Pavarësisht presionit të madh, Kombëtarja shqiptare arriti të sigurojë një fitore të vlefshme 1–0, falë golit të Rey Manajt, duke bërë një hap të rëndësishëm drejt kualifikimit në Kampionatin Botëror “FIFA World Cup 2026”.

Ky është dënimi i radhës që FIFA i vendos Serbisë për sjellje diskriminuese të tifozëve në ndeshje ndërkombëtare, një problem që organizata ndërkombëtare e futbollit e ka konsideruar të përsëritur dhe shqetësues.