Edhe pse prej 8 muajsh ndodhet në paraburgim, Erion Veliaj duket se vazhdon të frymëzojë… këngë. Një mbështetës i tij ka dërguar në redaksinë e JOQ Albania një video ku shfaqet duke kënduar me pasion për “lali Erin”, me vargje si: “Kush na del nga burgu, kush, kush; mëngjesin e zemrës ma mbush, lali Eri, rrush o rrush…”
Në mesazhin që shoqëron videon, qytetari shprehet plot entuziazëm: “Në rast se keni mundësi ta publikoni do ju falenderoja shumë, se kemi fishekzjarre dhe sot për lali Erin.” Ky “festival dashurie” për kryebashkiakun vjen vetëm dy ditë pas vendimit të Gjykatës Kushtetuese, që i dha Veliajt të drejtën të vazhdojë detyrën si kryetar Bashkie, edhe pse ndodhet në paraburgim.
Pas fishekzjarreve mbi burgun e Durrësit, duket se “arti” është bërë mënyra më e re për të festuar “triumfin” e drejtësisë shqiptare, që, siç thonë qytetarët me humor, “nuk njeh kufij, e as mure burgu”.
Nëse kjo është fryma e re e politikës shqiptare, atëherë kënga “Lali Eri, rrush o rrush” ndoshta do të bëhet hiti zyrtar i një epoke ku absurdi dhe pushteti këndojnë në unison.
