Reshjet e dendura të shiut që prej disa ditësh kanë përfshirë vendin tonë po lënë pas një panoramë të zymtë e plot pasoja. Në disa zona të Shqipërisë, natyra është treguar e pamëshirshme, lumenjtë kanë dalë nga shtrati, argjinaturat janë çarë, rrugë të tëra janë kthyer në kanale uji, ndërsa dhjetëra banesa janë nën pushtetin e ujit. Banorë të izoluar, familje të tëra në ankth dhe një pasiguri e vazhdueshme, kjo është gjendja që po kalon Shqipëria ditët e fundit.

Ndër pamjet më prekëse vjen ajo nga fshati Rrëmenjë i Pogradecit, ku shirat e rrëmbyeshëm kanë shkaktuar dëme të pallogaritshme. Aty, natën vonë, heshtjen e errët e ka çarë një dramë njerëzore. Niveli i ujit kishte pushtuar çdo cep të shtëpive. Brenda një prej banesave, uji ishte ngritur mbi 30 centimetra, duke kërcënuar çdo send dhe mbi të gjitha, çdo jetë brenda saj.

Në këtë situatë të dëshpëruar, një baba i shqetësuar, i lagur nga koka te këmbët, përballë forcës së pamëshirshme të ujit, mori vendimin e vetëm që mund t’i shpëtonte fëmijët e tij. Mes natës së errët, me dritën që venitej në sy të stuhisë, ai i ngriti në krahë të vegjlit dhe i nxori jashtë shtëpisë, duke iu hapur rrugë mes ujit.

Por mes gjithë kësaj dhimbjeje, banorët e Rrëmenjës shprehin edhe një tjetër hall: mungesën e reagimit të shpejtë nga shërbimet emergjente. Sipas tyre, thirrjet për ndihmë janë bërë herët, por ndihma ka mbërritur me vonesë apo jo në masën e kërkuar.

Shumë prej tyre thonë se policia dhe zjarrfikësit duhet të kishin qenë më të pranishëm, më të organizuar dhe më të gatshëm për të ndërhyrë në një situatë ku minuta të tëra mund të bëjnë diferencën midis shpëtimit dhe tragjedisë. Në një moment kur uji po rritej me shpejtësi dhe familjet po mbeteshin të bllokuara, banorët thonë se u ndjenë të braktisur.