Pas reshjeve intensive të shiut, në zonën e Qafë Thores kanë nisur reshjet e para të borës, duke mbuluar aksin Shkodër–Theth me një shtresë të bardhë që shënon fillimin zyrtar të dimrit në veri të vendit.
Aktualisht, rruga mbetet e hapur për qarkullim, megjithatë autoritetet u bëjnë apel drejtuesve të mjeteve të lëvizin me kujdes dhe të pajisen me zinxhirë, në rast se intensiteti i reshjeve rritet.
Ndërkohë, firma nënkontraktore ka nisur menjëherë punën për pastrimin e dëborës, me qëllim garantimin e qarkullimit normal në këtë aks të rëndësishëm turistik.
Pamjet e para nga Qafë Thore – Theth tregojnë një peizazh spektakolar të veshur me borë, duke i dhënë zonës atmosferën karakteristike të sezonit dimëror.
