Një aksident ajror me pasoja tragjike është regjistruar pranë aeroportit të Tolucas në Meksikë, ku një avion privat u rrëzua në një zonë industriale, duke shkaktuar vdekjen e dhjetë personave që ndodheshin në bord.

Sipas autoriteteve lokale, mes viktimave janë edhe tre fëmijë të mitur, të cilët dyshohet se i përkisnin së njëjtës familje: një djalë 4-vjeçar dhe dy vajza, përkatësisht 9 dhe 2 vjeçe. Në avion udhëtonin gjithashtu dy pilotët dhe pesë pasagjerë të rritur.

Avioni i tipit Cessna Citation III, i cili ishte nisur nga Acapulco, u rrëzua rreth orës 12:30 të pasdites, duke u përplasur me një depo industriale. Fillimisht u raportua për gjashtë viktima, por pas verifikimeve numri zyrtar i të vdekurve u konfirmua në dhjetë.

Pamjet nga vendngjarja tregojnë momentet pas rrëzimit, me tym të dendur dhe forca zjarrfikëse që ndërhynë për të shuar flakët dhe për të siguruar zonën. Sipas informacioneve paraprake, avioni po tentonte të kryente një ulje emergjente në një fushë futbolli pranë një zone lojërash për fëmijë, por humbi kontrollin dhe u përplas me ndërtesën.

Autoritetet meksikane kanë nisur hetimet për të zbardhur shkaqet e plota të aksidentit, ndërsa zona është izoluar për arsye sigurie. Ngjarja ka tronditur opinionin publik dhe ka rikthyer vëmendjen te standardet e sigurisë në fluturimet private.