Më 28 maj 2014, Athena Orchard, 13 vjeçe nga Leicesteri i Anglisë, humbi jetën pas një beteje me kancerin e kockave. Sëmundja kishte nisur si një tumor në kokë dhe më pas ishte përhapur në shtyllën kurrizore dhe shpatullën e majtë. Pas ndarjes së saj nga jeta, prindërit dhe gjashtë vëllezërit e motrat e Athinës mbetën plotësisht të shkatërruar.

Në ditët pas humbjes, babai i saj, Dean, mori përsipër detyrën e dhimbshme për të sistemuar sendet e vajzës. Por ajo që gjeti ndryshoi gjithçka. Teksa hoqi një pasqyrë të madhe nga muri, ai zbuloi një mesazh sekret, të shkruar nga Athena në pjesën e pasme të saj.

Pasqyra kishte një letër prej rreth 3 mijë fjalësh, të shkruar me stilolaps të zi nga lart poshtë. “Ajo nuk e kishte përmendur kurrë, por është diçka që ajo do ta bënte,” tha babai i saj për revistën People. “Ishte shumë shpirtërore, fliste për gjëra që unë shpesh nuk i kuptoja – ishte jashtëzakonisht e zgjuar.”

Letra zbulonte mendimet dhe ndjenjat më të thella të Athinës gjatë përballjes së saj me sëmundjen. Fjalët e saj ishin një thirrje për jetën, forcën dhe dashurinë.

Sot, edhe pse Athena nuk është më, pasqyra është kthyer në një kujtim të përjetshëm të shpirtit të saj.
“Do ta mbajmë pasqyrën përgjithmonë. Është një pjesë e saj që mund ta kemi ende në shtëpi,” tha nëna e saj, Caroline. “Duke lexuar fjalët e saj, ndihesh sikur ajo është ende këtu me ne. Kishte një shpirt të jashtëzakonshëm.”

Letra e plotë e Athinës (përkthim origjinal):

“Lumturia varet nga ne vetë. Ndoshta nuk ka të bëjë me fundin e lumtur, por me historinë. Qëllimi i jetës është të kesh një jetë me qëllim. Dallimi mes normales dhe të jashtëzakonshmes është ai pak më shumë. Lumturia është një drejtim, jo një destinacion. Faleminderit që ekziston. Ji i lumtur, ji i lirë, beso, përgjithmonë i ri. Ti e di emrin tim, jo historinë time.

Ke dëgjuar çfarë kam bërë, por jo çfarë kam kaluar. Dashuria është si xhami, duket shumë e bukur, por thyhet lehtë.

Dashuria është e rrallë, jeta është e çuditshme, asgjë nuk zgjat dhe njerëzit ndryshojnë. Çdo ditë është e veçantë, ndaj shfrytëzoje sa më shumë, sepse nesër mund të përballesh me një sëmundje që të ndryshon jetën. Jeta është e keqe vetëm nëse ti e bën të tillë. Nëse dikush të do, nuk do të të lejojë të largohesh, pavarësisht sa e vështirë është situata. Mos harro që jeta ka plot ngritje dhe rënie.

Mos hiq dorë kurrë nga diçka për të cilën nuk kalon asnjë ditë pa menduar. Dua të jem ajo vajzë që i bën ditët e këqija më të mira dhe që të bën të thuash: jeta ime ka ndryshuar që kur e takova!

Dashuria nuk ka të bëjë me sa herë thua ‘të dua’, por me sa e provon që është e vërtetë. Dashuria është si era, mund ta ndjesh, por nuk mund ta shohësh. Po pres të bie në dashuri me dikë ndaj të cilit mund ta hap zemrën. Dashuria nuk është me kë e sheh të ardhmen, por pa kë nuk e imagjinon dot jetën… Jeta është një lojë për të gjithë, por dashuria është çmimi. Vetëm unë mund të më gjykoj mua.

Ndonjëherë dashuria dhemb. Tani po luftoj me veten. Mund ta ndiej dhimbjen tënde. Ëndrrat janë realiteti im. Dhemb, por është në rregull, jam mësuar. Mos u nxito të më gjykosh, ti sheh vetëm atë që unë zgjedh të tregoj… nuk e di të vërtetën. Dua vetëm të argëtohem dhe të jem e lumtur pa u gjykuar.

Kjo është jeta ime, jo e jotja, mos u shqetëso për atë që bëj. Njerëzit do të të urrejnë, do të të vlerësojnë, do të të thyejnë, por mënyra si qëndron i fortë, kjo është ajo që të bën… ty!

Nuk ka nevojë të qash, sepse e di që do të jesh pranë meje.”