Fundjava e fundit e vitit dhe ditët e ndërrimit të viteve do të karakterizohen nga mot i ftohtë dhe temperatura të ulëta në të gjithë territorin e vendit.

Sipas sinoptikanëve, gjatë fundjavës së fundit të vitit pritet mot i kthjellët, por i ftohtë. Në Korçë reshjet e dëborës do të ndërpriten gradualisht me kalimin e orëve, ndërsa vendi në përgjithësi do të ndikohet nga masa ajrore të ftohta dhe të acarta. Vranësirat do të jenë të pakta dhe të përqendruara kryesisht në zonat malore.

Temperaturat minimale për fundjavën parashikohen të zbresin në -3 deri -4 gradë Celsius në zonat malore, ndërsa në ultësirën perëndimore nga -1 deri në 0 gradë Celsius.

Sinoptikanët theksojnë se nga dita e hënë dhe e martë, deri në ditët e ndërrimit të viteve, veçanërisht më 31 dhjetor dhe 1 janar, moti do të jetë edhe më i ashpër. Në relievet malore temperaturat minimale do të arrijnë në -8 dhe -9 gradë Celsius, në zonat e ulëta -4 deri -5 gradë, ndërsa në bregdet 0 deri në -1 gradë Celsius.

Temperaturat e mesditës gjatë fundjavës do të luhaten në 13–14 gradë Celsius, ndërsa gjatë ditëve të ndërrimit të viteve nuk pritet të kalojnë 7–8 gradë në ultësirën perëndimore. Era do të fryjë nga kuadrati i veriut.