Të paktën katër persona kanë humbur jetën dhe nëntë të tjerë janë plagosur si pasojë e një aksidenti të rëndë rrugor në zonën Esenyurt të Stambollit, ku një autobus që transportonte punëtorë doli nga rruga dhe u përmbys.

Sipas mediave turke, aksidenti ndodhi një ditë më parë, kur autobusi, për shkaqe që ende nuk janë sqaruar zyrtarisht, humbi kontrollin, doli jashtë karrexhatës dhe u përmbys.

Menjëherë pas ngjarjes, autoritetet u vunë në alarm, ndërsa në vendngjarje mbërritën ambulanca, patrulla policie dhe forca zjarrfikëse për të ofruar ndihmë dhe për të nxjerrë pasagjerët e bllokuar.

Shërbimet shëndetësore konfirmuan se katër pasagjerë u nxorën pa shenja jete, ndërsa nëntë persona të tjerë mbetën të plagosur dhe u transportuan në spitale pranë zonës. Sipas burimeve mjekësore, disa prej të plagosurve ndodhen në gjendje të rëndë shëndetësore dhe janë nën kujdes intensiv.

Autoritetet nuk përjashtojnë mundësinë që bilanci i viktimave të ndryshojë, ndërsa hetimet për shkaqet e aksidentit vijojnë.