Kryeministri Edi Rama njoftoi masa të reja për territorin e Qendrës Spitalore Universitare “Nënë Tereza”, duke bërë të ditur se të gjitha automjetet e parkuara në oborrin e QSUT-së do të largohen, me përjashtim të mjeteve të shërbimit dhe stafit spitalor. Sipas tij, hapësira aktuale e mbushur me makina do të transformohet në një park të madh publik brenda kompleksit spitalor.

Rama theksoi se parkimi brenda territorit të spitalit do të ndërpritet, ndërsa automjetet do të zhvendosen në një parkim multifunksional të posaçëm.

“Të gjitha makinat nga territori i QSUT do të hiqen, do të bëhet park. Të gjitha automjetet, përveç atyre të punës, do të kenë vendin e tyre në parkimin e madh multifunksional të qendrës,” deklaroi kryeministri, duke shtuar se synimi është krijimi i më shumë hapësirave të gjelbra dhe një ambienti më funksional për pacientët dhe vizitorët.

Sipas qeverisë, projekti synon të eliminojë trafikun e brendshëm, kaosin e parkimit në oborrin e spitalit dhe të përmirësojë qarkullimin e emergjencave.

🔹 Investime dhe ndërtime të reja në infrastrukturën spitalore

Në vijim të deklaratës, Rama përmendi edhe disa projekte që, sipas tij, janë në ndërtim ose në fazë kolaudimi:

Godina e re e “Mbretëresha Geraldinë”

Spitali i ri i Kardiologjisë në QSUT

Rindërtimi i spitalit të Peqinit

Rindërtimi i spitalit të plastikës

Qendra “back-up” në Vlorë

Ndërtimi i disa pavijoneve të tjera spitalore

Ai theksoi se këto ndërhyrje janë pjesë e një programi modernizimi të sistemit shëndetësor publik.

🔹 Rritje pagash dhe njohje e vjetërsisë për mjekët dhe infermierët

Në fund të fjalës së tij, kryeministri njoftoi gjithashtu se paga e mjekëve do të rritet edhe me 135 euro, ndërsa për personelin shëndetësor do të n jihet vjetërsia e punës, e cila pritet të reflektohet në përfitimet financiare.