Një rast shqetësues i neglizhencës ndaj kafshëve është raportuar në aksin nacional Shkodër–Koplik, konkretisht në zonën e Shtojit të Vjetër. Prej më shumë se tre ditësh, një gomar ndodhet i aksidentuar nga një automjet, i shtrirë pranë rrugës, pa asnjë ndërhyrje apo ndihmë, ndërkohë që ende është gjallë.

Sipas denoncimeve të qytetarëve, kafsha ndodhet në gjendje të rëndë shëndetësore, duke vuajtur dhimbje të mëdha dhe duke u përballur çdo moment me rrezik të shtuar, si nga qarkullimi i automjeteve ashtu edhe nga kushtet atmosferike. Pavarësisht se zona është mjaft e frekuentuar dhe se prej ditësh aty kanë kaluar automjete dhe banorë, deri më tani nuk është ndërmarrë asnjë veprim për ta ndihmuar apo për ta transportuar drejt një shërbimi veterinar.

Ky rast ngre shqetësime serioze mbi mungesën e reagimit institucional dhe ndërgjegjësimit për mbrojtjen e kafshëve, si dhe mbi zbatimin e ligjit për mirëqenien e tyre.

JOQ Animals u bën thirrje urgjente institucioneve përgjegjëse, shërbimeve veterinare, strukturave lokale dhe çdo organizate apo individi që ka mundësi të ndërhyjë, që të veprojnë menjëherë për shpëtimin e kafshës dhe për t’i dhënë fund kësaj situate të rëndë dhe çnjerëzore.