Ka ndërruar jetë në Spitalin e Traumës Mareglent Asllani, 43 vjeç, i cili u aksidentua pak ditë më parë në aksin rrugor Peqin–Elbasan.
Sipas informacionit zyrtar, 43-vjeçari po udhëtonte me automjetin e tij kur u përplas me një makinë tjetër që drejtohej nga një 26-vjeçare. Si pasojë e përplasjes, Asllani mbeti i plagosur rëndë dhe u transportua me urgjencë në Spitalin e Traumës, ku ndodhej nën kujdesin e mjekëve, por nuk arriti t’u mbijetojë plagëve të marra.
Ndërkohë, 26-vjeçarja e përfshirë në aksident mbeti e plagosur, por ndodhet jashtë rrezikut për jetën.
Policia bëri me dije se grupi hetimor vijon punën për sqarimin e shkaqeve dhe rrethanave të aksidentit, ndërsa materialet procedurale i janë referuar organeve përkatëse për veprime të mëtejshme.
