Një fenomen i rrallë natyror, i njohur si meteotsunami, ka goditur bregdetin e Argjentinës, duke shkaktuar humbjen e jetës së një personi dhe plagosjen e të paktën 35 të tjerëve. Ngjarja ndodhi të hënën në zonën e Mar Chiquita dhe Santa Clara del Mar, duke përhapur panik mes mijëra pushuesve.
Mbrojtja Civile Provinciale konfirmoi se viktima është një burrë 29-vjeçar, Yair Manno, banues në Mar del Plata. Sipas raportimeve, ai ndodhej pranë peshkatarëve në lagunën Mar Chiquita kur valët e fuqishme pushtuan papritur zonën. Dyshohet se Manno u rrëmbye nga rryma dhe goditi kokën në shkëmbinj. Pavarësisht ndërhyrjes së menjëhershme të rojeve bregdetare dhe tentativave për ringjallje kardiopulmonare (CPR), ai u shpall i vdekur.
Të paktën 35 persona të tjerë u trajtuan në vendngjarje dhe në spitale për dëmtime të ndryshme, përfshirë prerje, goditje dhe gërvishtje. Mediat raportojnë gjithashtu se një burrë u shtrua në spital pasi pësoi një atak kardiak gjatë kaosit të shkaktuar nga valët.
Pamjet e shpërndara nga agjencitë ndërkombëtare tregojnë turma njerëzish që përpiqen të largohen në panik nga bregu, ndërsa valë gjigante përplasen me forcë në plazh. Sipas autoriteteve, në momentin e incidentit ndodheshin rreth 5,000 persona në ujë dhe shumë të tjerë në vijën bregdetare.
Shefi i Mbrojtjes Civile për provincën e Buenos Aires, Fabián García, deklaroi se ngjarja ishte e paparashikueshme dhe se nuk kishte paralajmërime meteorologjike apo studime shkencore që ta parashikonin atë. Valët e shkaktuara nga meteotsunami raportohet se arritën deri në 4.5 metra lartësi.
“Meteotsunami është një fenomen i rrallë që ndodh si pasojë e ndryshimeve të papritura të presionit atmosferik, erërave ose kushteve ekstreme të motit. Nuk e dimë nëse një ngjarje e tillë mund të përsëritet,” u shpreh García për mediat lokale.
Dëshmitarët okularë përshkruan skena dramatike, ku deti u tërhoq fillimisht në mënyrë të pazakontë dhe më pas u rikthye me forcë shkatërruese, duke marrë me vete çadra, karrige plazhi dhe sende personale të pushuesve.
