Një moment i fortë tensioni është regjistruar së fundmi brenda shtëpisë së Big Brother VIP Albania, duke ndezur menjëherë reagime të shumta në rrjetet sociale. Gjatë një situate të kapur nga kamerat, dëgjohet Keijsi teksa i drejtohet Ina Aderit me fjalë kërcënuese:

“Do hash grushta, shih këtu. Do hash grushta po them kur të dalim jashtë”.

Megjithatë, deri më tani nuk janë sqaruar plotësisht rrethanat konkrete që çuan në këtë shpërthim verbal, çka ka lënë hapësirë për interpretime dhe debate të forta nga publiku.

Tensionet në shtëpi janë shtuar ndjeshëm pas hyrjes së Inës disa ditë më parë. Situata u përkeqësua pas hapjes së Kutisë së Pandorës nga Stelina, ku u zbulua një video që tregonte Keijsin – ish-partnerin e saj – duke u puthur në buzë me Ina Aderin gjatë ditëlindjes së kësaj të fundit.

Ky zbulim e vuri Stelinën në një pozitë të vështirë emocionale, veçanërisht pasi si pjesë e sfidës ajo u detyrua të jetojë në të njëjtin ambient me Inën, vajzën që u shfaq në pamjet komprometuese me ish-partnerin e saj.

Atmosfera në shtëpi mbetet e rënduar, ndërsa publiku pret reagimin e produksionit dhe sqarime të mëtejshme mbi këtë incident, i cili mund të ketë pasoja serioze në vazhdimësinë e lojës.