Një vinç ndërtimi është shembur të enjten pranë kryeqytetit Bangkok në Tajlandë, duke shkaktuar vdekjen e dy personave. Ngjarja ka ndodhur në provincën Samut Sakhon, gjatë punimeve për zgjerimin e autostradës ‘Rama 2’, një nga rrugët kryesore që lidh kryeqytetin tajlandez me zonat përreth.

Sipas autoriteteve, vinçi u rrëzua mbi një segment rruge të ngritur, duke zënë nën rrënoja dy automjete. Ministri i Transporteve, Phiphat Ratchakitprakarn, konfirmoi se dy persona kanë humbur jetën, ndërsa nuk përjashtohet mundësia që të ketë edhe viktima të tjera, pasi zona konsiderohet ende e pasigurt për ekipet e shpëtimit.

Punonjësit e emergjencës kanë deklaruar se ndërhyrja është kufizuar për shkak të rrezikut të shembjeve të tjera, pasi në vendngjarje ndodhen ende struktura metalike të paqëndrueshme. Për këtë arsye, kërkimet po zhvillohen me masa të shtuara sigurie.

Projekti rrugor ku ndodhi aksidenti ka qenë shpesh në qendër të kritikave për shkak të incidenteve të përsëritura gjatë ndërtimit. Autoritetet kanë nisur hetimet për të zbardhur shkaqet e shembjes, ndërsa ende nuk janë bërë publike detaje mbi përgjegjësitë.

Ngjarja vjen vetëm një ditë pas një tjetër tragjedie në Tajlandë, ku një vinç ra mbi një tren pasagjerësh në lëvizje në verilindje të vendit, duke shkaktuar vdekjen e 32 personave. Autoritetet kanë përfunduar kërkimet për të mbijetuar dhe po vijojnë hetimet për këtë aksident të rëndë.